Sosialisme democrata
Sosialisme democrata es un filosofia political cual promove democratia political longo la posese sosial de la modos de produi, con un asentua sur autodirije e dirije democrata de instituis economial en un mercato o alga forma de economia desiniada desentrida. Sosialiste democrata crede ce capitalisme es nonconveninte con la valuas democrata de libria, egalia, e unia, e ce esta ideales pote sola es atenida par la reali de un sosia sosialiste.
La ajetiva "democrata" es usada per distingui sosialistes democrata de la sosialistes marxiste-leniniste plu ortodox, cual es comun videda como nondemocrata. Sosialistes democrata oposa la sistem staliniste e la model soviet de economia, la forma de governa autoritar e economia sentrida cual ia developa en la Soviet Union en la sentenio 20.
Sosialisme democrata es distinguida de democratia sosial car la sosialistes democrata es dedicada a la cambia sistemal de la economia de capitalisme a sosialisme, contra ca democratas sosial suporta reformis de capitalisme. Sosialistes democrata crede ce reformis dirijeda a la solve de nonegalias sosial e intervenis par la stato per supresa de contradises economial de capitalisme va vide sola sua emerje a otra locas e tempos en un aspeta diferente. Sola recambia la sistem capitalisme con un sistem sosialiste pote solve la problemes de capitalisme.
La orijinas de sosialisme democrata pote es trasada a la pensores utopian de la sentenio 19 e la promove brites de la cartistes. En la sentenio 20, la reformi gradaliste de la fabianes en Britan e Eduard Bernstein en Deutxland ia influe la developa de sosialisme democrata.